2009年3月22日 星期日

捉鼠英雄 !!!!

繼琴晚搵唔到老屎,
以為安心 (其實 ... 每入一次廚房, 都喺個玻璃望一望),
正當想洗衫之際,
嘩嘩嘩嘩嘩 ... 老鼠尾 !!!!!!
喺洗 E 機裡面,
嚇到腳軟, "櫃" 左喺地下,
好驚好驚, 企唔番起身,
貞子入後波, 爬番出廳 !!

第一個, 打俾小基 ...
求救失敗 ...
第二個, 打俾大鐵人 (雖然明知佢返緊工),
喊到癲左 ... 大鐵人完全聽唔到我 up 乜,
淨係聽到我喊喊喊 !!!
第三個, 打俾阿姨,
冇人聽 ...
第四個, 打俾姨丈,
"得啦阿女, 放工上黎, 你而家返入房先啦"

等唔切姨丈上黎,
大鐵人上黎救我 !!!

當我留喺安全既地方等大鐵人既時候,
管理員阿姐問我做咩事喊得咁淒涼,
我就發哂茅咁同佢講屋企有老鼠 (當時 d 雞皮, 一直都冇退過),
之後 ... 佢地派左 3 個人上黎捉米奇 !!

搵左好耐, 搵唔到 ...
想收隊, 我又發哂茅咁話 "有架有架, 我真係見到架 !!! "
(當然, 我仲係喊到癲左啦)
佢地見我驚成咁, 唯有繼續搵啦,
最終都係空手而回 !!!

冇耐 ... 姨丈到 !!!
佢 2 公婆都係不停笑我,
洗衣機都拆埋, 都係搵唔到 (其實, 有一刻我有諗過, 真係想 pat 左部洗衣機 !! )
我仍然唔放心, 叫姨丈再檢查下,
頂 ... 喺雪櫃後面 !!!

我又九秒九衝落管理處,
最後 .... 終於處決左米奇 !!!

搞完一大輪, 去左孖女屋企食飯,
唉 ... 呢單野, 應該有排俾佢地笑 !!!

人地真係好驚丫麻 !!!
我都唔想架麻 !!!
我都唔係好明,
我住 11 樓, 仲要有 2 隻貓,
屋企應該連人都可以餓得死, 睇怕都冇野食可以引到佢地丫,
點解可以會有老鼠 ?? 點解點解 ???????????

再一次証明,
高生真係一個萬能姨丈 !!!
我真係諗唔到有 d 咩,
佢係做唔到 !!!

p.s. ... 雖然米奇已經捉 ed, 但係 ... 每次入廚房, 都仲係好驚好驚 !!!!!





3 則留言:

匿名 提到...

算啦 佢地過多一排就冇野架啦 總之唔好見到珍E 同埋唔好驚啦冇是架啦

匿名 提到...

咪離老鼠...

匿名 提到...

幫唔到你d乜,sorry!!好彩有人救到你,
聽到你把聲,都知你好驚,老鼠啫,傻妹!!
唔洗驚,米奇已經死左丫啦,廚房冇老鼠架喇 !!