Something about ME !! Especially for U !!

1. 我的志願 ...
從來都冇諗過要做一個叻既人, 因為我深明一個道理 ... 越叻就會越大壓力 !! 自己知自己事, 自問受唔到 D 咩壓力 ... 雖然而家都唔周知自己做緊乜, 但係已經覺得好辛苦, 多次想放棄 ... 其實簡簡單單, 結婚生仔 ... 我相信, 我係會 enjoy 做一個湊仔返學, 陪仔仔讀書既媽咪 ~~~

2. 三秒變臉 EQ 低 ...
企喺身同師奶仔講野果時仲係笑笑口, 一坐番低睇到果位小姐所寫既信, 不消 2 秒就可以令我升上天 ... 繼而想燒佢數簿 & 剪佢個咀 !! 其實, 我真係好想搵一次認真咁同佢講 "我真係唔撚明你寫乜" ... 好快好快, 我就會由開開心心, 蹦蹦跳既聲轉化為 "同聲調, 冇尾音" 既晦氣衰聲 !! 果把死人聲, 真係衰到冇人有 !!!

3. 硬頸 …
只要自己覺得係岩, 好難去改變我既想法 … 如果真係想改變我, 請記住我係 “受軟唔受硬” !! 你施行硬攻, 我條頸只會更硬 !!

4. 對事不對人 ...
就算你幾咁 nice, 但係做野連累到埋其他人, 我一樣會黑你面 ... always 想將所有事做到最好 ... 無奈能力有限, 事與願遺 ... 相反, 就算你做野幾咁差, 我都唔會因為你既 “工作效率” 而唔鍾意你 !

5. 自住但不獨立 ...
當天下間所有人都認為我一個人係生活唔到既時候, 偏偏自己搬左出黎住 ... 我認我依賴心極之重, 享受俾人 "縱" .... 以前係, 而家都係 ... 我有理由相信, 冇左班朋友, 唔俾我講野, 冇人陪我游山玩水, 我係絕對會死 !! 好彩, 一路以黎都有縱到我癲既十六號大鐵人 & 由讀書玩到結哂婚, 生埋仔既朋友們, 愛死你地 !!

6. 多重性格 ...
初初識我, 唔熟我既人, 會覺得我斯文 (唔出聲果陣, 都呃得下人) ... 識耐左, 原來係低能 (乜叉野都講 / 笑一大餐) ... 再識耐 d , 原來係男人 (粗魯, 講野大聲, 會棟腳坐, 飲酒多過你, 醉左仲會講粗口)... 再識耐 d , 又會變番女人 (能夠見識 "變番做女人" 呢個階段既朋友, 應該真係識左我好一段日子 or 做過我男朋友既人 ... 要去到呢個 level , 先會 sense 得到我原來係一個女人仔)

7. 增強正能量既方法 ...
方法一) 散步 ... 四圍行, 四圍行, 見路就行 ... 上山, 海灘, 效區, 乜都行一餐 ... 帶埋公仔, 帶埋相機, 影影影 ... 散完步, 影完相, 心情真係會好起來 (最高紀錄, 係一口氣行左 7 個鐘) ... 咁多年以黎, 呢個方法, 只係失手過兩三次, 其實比率都算係好高架喇 ....
方法二) 吸收人地既正能量, 如 ... 搵 B B (喺呢一年裡面, 真係要多謝貞貞成日帶晴晴出黎同我玩) .... 當負能量超標時, 同人地既 B B 玩下, 真係會咩煩野都暫時放埋一邊 ... so good !!

8. 任性 ...
做事唔會諗後果, 想做就想立刻去做, 想愛就會立刻去愛, 就算身邊有一千個人同你講 "咁咁咁係有問題", 問題 ... 我係明, 但係 ... 很抱歉, 我仍然想去做, 因為我仍然相信直覺 / 感覺 ... 不過, 而家已經再冇任性既本錢, 可能 ... 唔敢再太在意感覺呢一回事 ~~~

9. 主觀 ...
超級主觀, 鍾意就鍾意, 唔鍾意, 呢一世都唔洗旨意我會鍾意 !!

10. 易滿足的無聊仔 ...
我認我係無聊仔, 寧願花心思去整手作仔, 講無聊野, 買小禮物 ... 都唔想用腦去計算呢個人心裡面諗緊乜, 會點對自己 ... 可以令身邊既人開心, 無聊下又有乜所謂 ... 易滿足 ... 只要少少野, 一粒果汁糖, 一個小玩具, 一枝珍寶珠, 都夠令我開心一日; 相反 ... 好少事, 亦會令到我好唔開心 ...

11. 喊包 ...
細細個唔會喊, 反而越大就越易喊, 不過, 我只會喺我信任既人面前喊 …. 激動會喊, 俾人屈會喊, 同人鬧交會喊, 傷心會喊, 朋友婚禮會喊, 睇新聞會喊, 見到小強會喊 ... 2 年前, 曾經好擔心自己會因為喊得太多而盲 !!

12. 雪糕之謎 …
他朝有一日我同你地講 “我想去食雪糕呀”, 唔好以為係好事 … 事關, 我只會喺 “谷底” 既時候先會想食雪糕 !

13. 細膽 ... 乜都驚一餐, 深信世間上係有鬼!! 除左鬼 ... 行雷 & 小強係我生命裡最大既敵人 !! 雖然小強只係一隻小昆蟲, 但係 ... 佢既破壞力, 比起人, 有過之而無不及 !! 好耐好耐之前, 試過因為同強哥喺廚房交手, 嚇到我一口氣打爛左十幾隻碗 !! 又試過因為喺不知情之下同強哥一齊沖左個涼, 而動用左全屋既武器 ( 1 枝萬潔靈, 1 枝藍威寶, 1 枝漂白水) 去對付強哥 ... 最終, 雖然強哥俾我漂成灰色, 不過 ... 嚇到我喺個廳度喊左一個鐘 !!

14. 鍾意食草根野 ...
山珍海味, 鮑蔘翅肚 .. No Way !!! 劉綺琪 concept ... 臭 & 樣衰既野, 從來唔會擺入口 !! 鮑魚 / 薑 / 皮蛋 / 莞茜 / = 臭, 海蔘 / 水魚 = 樣衰 .... 魚蛋, 燒賣, 煎釀三寶, 豬腸, 車仔麵, 蒸水蛋, 叉燒, 雞煲, 蒸肉餅, 沙嗲牛麵 = 賣飛佛 ... 每次出 trip 前, 一定要食到是但一樣, 否則 .. 果次既 trip , 一定會日日講住同一番話 “我好想食 XXXX 呀 “ … 係日日都會講, 班同事唔俾我煩死先至奇 !!!!

15. 衣著品味 …
衫褲鞋襪, 有蝴蝶 / 波波 / B B 領 / 公主袖 / 簡條 / 粉紅色 / 桃紅色 = 靚 !!! 每次陪我去買衫既朋友, 一見我拎起某件衫, 大多數都會講同一番話 “呢件同你邊邊次著果件有咩分別 ?” … 我就會理直氣強壯咁答 “有唔同架 … 隻粉紅色深淺唔一樣, 同埋, 呢件多左個蝴蝶架 !! “ …

16. 疊字怪 …
由細到大, 身邊都有好多小朋友, 經常同 D 細路傾計, 養成 “疊字” 既習慣 …識我唔耐既人可能會覺得我扮 cute, 識得我耐既人就會知, 我真係戎唔甩呢鋪引 … 車車 (車仔麵), 麵麵, 暖暖燈, 花花, 雞雞, B B 電 (3A 電) … 就連 2 隻貓 … 個名都要係疊字 …

喂 ~~
呢篇野, 因為你既說話而 delete,
今日, 亦都因為 "你想睇多次" 而再 post,
哈 ~~~